ԱՇԽԱՐՀԸ ԽԱՂ Է

ԱՇԽԱՐՀԸ ԽԱՂ Է, ԵՒ ՄԵՆՔ ԽԱՂԻ ՄԱՍՆԱԿԻՑՆԵ՞ՐԸ

Ընդամենը երկու տարի առաջ չէի կարող պատկերացնել, որ ինձ կհետաքրքրեն տեխնոլոգիաները, եւ մասնավորապես`նոր տեխնոլոգիաների ու լրագրության համադրումը:

Երեւի, եթե մեր օրերում մենք չենք հետաքրքրվում տեխնոլոգիաներով, ապա տեխնոլոգիաներն են զբաղվում մեզնով :):):)  

2010-2011 ուսումնական տարին ես անցկացրել եմ ԱՄՆ-ի Սթենֆորդի համալսարանում`Սիլիկոնե հովտի սրտում`ուսումնասիրելով 2010-ից մեծ թափ հավաքած Գեյմիֆիքեյշն`խաղաֆիկացիա ուղղությունը, եւ աշխատել եմ հանրային թղթակցության ու լրագրության համագործակցությունը խթանելու նպատակով ստեղծվող «Իմ լուրերը» հարթակի գաղափարի մշակման վրա:

Խաղաֆիկացիայում մասնագիտացողները հավատում են, որ վերափոխելով Շեքսպիրյան հայտնի տողը`մենք այսօրվա համար ճիշտ բնորոշում ենք գտնում. աշխարհը խաղ է, եւ մենք այդ խաղի մասնակիցները:

Բոլորովին վերջերս խաղային մեխանիզմների ներդրմամբ հաջողվեց լուծել մի կարեւոր խնդիր, որ չէր հաջողվում լուծել միայն համակարգիչների կամ համակարգչային ծրագրերի օգնությամբ: 

Գիտնականները դիմեցին հանրության`խաղեր խաղացողների օգնությանը:

Foldit խաղի մասնակիցները կարողացան վերլուծել ՁԻԱՀ-ի սպիտակուցների դասավորությունը: Այսինքն, առցանց խաղ խաղացողներն օգնեցին հայտնաբերել ՁԻԱՀ վերարտադրության մեջ ներգրավված սպիտակուցների կառուցվածքը: 

Այս հայտնագործությունը կօգնի գիտնականներին նոր դեղամիջոցի մշակման հարցում: Առաջին անգամ պատմության մեջ խաղերի շնորհիվ գիտական հայտնագործություն կատարվեց:

«Սիմփլ էներջի» խաղն էլ խաղային տարրերի ներդրումն է ԱՄՆ-ի էներգետիկայի ոլորտում. այս խաղի շնորհիվ սպառողները խնայում են էլեկտրաէներգիան. ամեն անգամ հոսանքն անջատելիս, նրանք միավորներ են ստանում:

Նմանատիպ խաղերն ունեն իրենց բնորոշումը`լուրջ խաղեր: Այս ուղղությունն արագ զարգացող ոլորտ է. ամեն տարի Նյու Յորքում «Լուրջ խաղեր» համաժողովում ամփոփվում են ոլորտի զարգացումները;

Մեկ այլ`«Սփենթ» խաղն իր մասնակիցներին հնարավորություն է տալիս «իրենց մաշկի» վրա զգալ, թե ի՞նչ է նշանակում լինել աղքատ, անտուն, ունենալ սահմանափակ ֆինանսական միջոցներ, լինել գործազուրկ:  Խաղն ԱՄՆ-ում ստեղծվել է վերջերս, այն նպատակ ունի մարդկանց ուշադրությունը սեւեռել աղքատության խնդիրների վրա  եւ սթափեցնել նրանց, ովքեր շռայլորեն ծախսում են իրենց գումարները միայն իրենց կարիքների համար:

Խաղաֆիկացիայի միջոցով կարելի է ազդել մարդկանց վատ սովորույթների վրա. այն խրախուսում է մարդկանց մասնակցությունը ոչ թե պարսավանքի, մեղավորության զգացում արթնացնելու, այլ` խրախուսանքի, փառքի հասնելու, զարգանալու եւ առաջ գնալու հնարավորություններ ստեղծելով:

Խաղաֆիկացիայի 75 տոկոսը հոգեբանություն է, իսկ 25 տոկոսը`տեխնոլոգիա, ասում է այս ոլորտի ճանաչված մասնագետ Գեյբ Զիքերմանը:

Վերլուծաբանները գտնում են, որ մինչ 2014 թվականը խաղաֆիկացիան կդառնա նույնքան կարեւոր տարր, որքան Ֆեյսբուքում կամ այլ հայտնի սոցիալական ցանցում էջ կամ հաշիվ ունենալը:

Այս վերլուծությունների մասին ես դեռ չգիտեի, երբ 2010-ից սկսեցի հետաքրքրվել հանրային թղթակցության եւ խաղային մեխանիզմների հնարավոր մերձեցման հեռանկարներով:

Խաղաֆիկացված «Իմ Լուրերը» հանրային թղթակցության նախագիծն իրականացնելու եւ հանրային թղթակցության ու պրոֆեսիոնալ լրագրության համագործակցությունը խրախուսելու համար`ես իմ գործընկերներից մի քանիսի հետ նախաձեռնեցի «Հանրային լրագրության ակումբ» հասարակական կազմակերպության ստեղծումը: 

Սեդա Մուրադյան, 
15.09.2011թ.